Nūtyka skotuvis runys konkurss „Vuolyudzāni“
27.aprelī, Latgolys kongresa pīminiešonys dīnā, nūtyka skotuvis runys konkursa „Vuolyudzāni“ i 20. atkluotuos vaļsts olimpiadis latgalīšu rokstu volūdā nūslāguma pasuokums, kurā tyka gūdynuoti uzvarātuoji. „Vuolyudzānūs“ šūgod pīsadaleja 21 deklamātuojs i latgalīšu prozys tekstu skaiteituojs.
Dailrunuotuojus viertēja dzejneica Anna Rancāne i režisore Māra Zaļaiskalns. Jūs viestejums skaņ:
„Vuolyudzāni“ — godskuortejuo pavasara prīca! Jau ūtrū godu bārnim i jaunīšim juopuorvar saskarsmis tryukuma barjera, tys, ka videoīrokstā navar sajust klauseituoja tyvumu, bet jī ar tū veiksmeigi teik golā. Itys gods īsazeimej ar loba, vacumam pīmāruota repertuara izvieli. Prūtams, vīgļuok ir skateituoju pajimt ar jūku paņtenim, bet myusu vuolyudzāni teik golā ari ar nūpītnu, dziļu literaturu. Tū var redzēt jūs acīs, jo acs namaloj!
Konkurss līcynoj par tū, ka saimēs tūmār ir dzeiva latgalīšu volūda, ka bārni jū muok i lītoj. Paļdis vysim dalinīkim, gūdolguotūs vītu nav daudzi, bet grybātūs bez laureatu paslavēt vēļ tūs, kam datryuka nadaudz — i Grietu, i Kresceņteju Tekli, i Romualdu, Ralfu i Rūtu, da i vysus, vysus! Paļdis školuotuojim, paļdis vacuokim, eipaši jau tai breineigajai babeņai, kura sovu unuku Kristoferu vuica tāvutāvu volūdeņā! Lai vysim Dīva paleigs i prīca!“
Šūgod daudzi školāni runuot beja izalasejuši fragmentus nu jaunuokuos latgalīšu literaturys, tū atzeimēja i Izgleiteibys ministre Ilga Šuplinska.
Taipat nu poša reita školys varēja pīsadaleit nūvodvuiceibys stuņdēs. Jaunīši, kas vadeja stuņdis, — Ēriks Zeps, Dāvis Suharevskis, Evika Muizniece — jau ir īrakstejuši sovu vuordu Latgolys kulturviesturē.
Nūvodvuiceibys stuņdis var nūsavērt https://www.youtube.com/channel/UCALP7Fam0rROugichV9gzQQ
Aicynoju sovu latgaliskū ideņtitati aplīcynuot ar konkretim dorbim, na vuordim!
Dailrunuotuoju konkursa „Vuolyudzāni“ rezultati:
| Klašu grupa | Vuords, uzvuords | Škola | Školuotuojs | |
| 1. vīta | ||||
| 1.– 4. | Kristiāns Dzalbs | Kruoslovys Vaļsts gimn. | Valentīna Geka | |
| 5.– 9. | Agate Opincāne | Bieržgaļa p-škola | Gunta Kopeika | |
| 10.– 12. | Kaspars Stolipins | Malnovys koledža | Inta Miņina | |
| Simpateju bolva –– Kristofers Apeins (3g.) | Reigys PII “Austreņa” | Mārīte BikovskaInese Apeine | ||
| 2. vīta | ||||
| 1.– 4. | Paula Blusanoviča | Ludzys Muzykys p-škola | Dace Tihovska | |
| 5.– 9. | Emīls Grišāns | Kruoslovys Vaļsts gimn. | Ingrīda GrišāneIlga Stikute | |
| 10.–12. | Maksims Pavlovs | Ludzys piļsātys gimn. | Vanda Žulina | |
| 3. vīta | ||||
| 1.– 4. | Olga Meleka Galilejeva | Mežvydu pyrmškola | Inga Skrebinska | |
| 5.– 9. | Andris Anckins Kaspars Vistopols | Ruguoju nūvoda v-školaTukuma E. Birznīka-Upeiša p-šk. | Evija KonivaleTamāra Balode | |
| 10.–12. | Viktorija Lukšāne | Nautrānu v-škola | Ruta Krišāne | |